Тацяне Марыніч і Анастасіі Хамянковай інкрымінавалі па 9 артыкулаў Крымінальнага кодэксу. Іх зьбіраюцца судзіць завочна, пішуць праваабаронцы.
Іх запрашаюць вярнуцца ў Беларусь і прыйсьці ва Ўпраўленьне Сьледчага камітэту Рэспублікі Беларусь па Менску.
У сакавіку 2021 году ў менскі офіс «Імагуру» штурмавалі сілавікі ў масках, якія затрымалі некалькі дзясяткаў удзельнікаў устаноўчай канфэрэнцыі Лігі студэнцкіх аб’яднаньняў. Пасьля гэтага дзейнасьць бізнэс-прасторы ў Беларусі давялося згарнуць, а маёмасьць перадаць на дабрачынныя мэты.
Цяпер арганізацыя працуе за мяжой.
Заснавальніца «Імагуру» Тацяна Марыніч пасьля сьмерці свайго мужа, былога міністра замежнаэканамічных сувязяў і дыплямата Міхаіла Марыніча, выехала ў Гішпанію.
У Беларусі спэцвядзеньне адбываецца ў адносінах некалькіх дзясяткаў чалавек. Гэта вядзеньне ў крымінальнай справе ў дачыненьні абвінавачанага, які знаходзіцца за межамі краіны.
Папраўкі ў Крымінальна-працэсуальны кодэкс, якія даюць магчымасьць завочна праводзіць сьледзтва і суды над асобамі, якія знаходзяцца за мяжой, а таксама канфіскоўваць іх маёмасьць, набылі моц летась 27 ліпеня.
Форум